United States a Washington Metro Area-ah hian vur tlain sur ve ṭhin mahse a tlangpui thuin vur surna ṭhin hmundang ai chuan a ziaawm fo ṭhin. Kum 2009 thlasik chho velah khan hrat theih chin a Washington Metro Area a snow storm nasa ber chu a awm a, 2010 February a mi phei kha chu”Snowmageddon” tih hming a chawi ta nghe nghe a nih kha.
Snowmageddon
Tichuan kum thum emaw lai thlasik mumal pawh nei lova Washington Metro Area a awm hnu, December 8, 2013 chawhnu aṭangin vur chu namen lovin a sur ve leh ṭan ta. He vur rawn haw hian hmun a awh zau em em mai a, United States a hmun tamzawk chu a hrut kim deuh vek awm e. Kan awmna khua Frederick (City of Frederick), Maryland state-ah chuan Chawlhni, December 8, 2013 chuan inchi 8 a sur e an ti a, kan kawmcharah erawh feet khat emaw tal chu a teh theih a, hmelhriat dangte pawhin chutiang zat bawr vel chu an sawi tho mai.
Kan kawmchar a pot lian ve tak a vur awm:
Kan ṭhenawm nula pawhin a walk a ṭhulh phah love:
Keini ang michhe eizawng tan chuan a feh chhuah loh theih si lova, tichuan motor kal vel (traffic) a chhiat ring sa ranin minute 45 vel a ka thlen ṭhin chu darkar 2 hun inpein tlai dar 3 a hna ṭan tur chuan dar 1-ah ka chhuah phah ta a ni.
Rin lawk ang ngeiin kan khaw dai ka thlen aṭang chuan kawng sirah motor a awm chho ta thliah thluah reng a. Ka ngaihtuah chhuah hnu chuan motor 20 ka chhiar thei a, a hnu chu a chhiar zawm ta lo. Motor accident leh kawngpui sir daih a tleng chhuak a tang zingah chuan tunlai khawvel motor ṭha a lar, Range Rover te, Mercedes Benz te, Altima SUV te leh Honda Pilot te pawh an tel nawk mai. Tun hma a Chawngte kawngchhiat lai (1985) a motor khalh ṭhin ka nih chu ka rilruah chuan a awm ran mai a, kawngah chuan ka tang ve ang tih minti hlau zual ngei mai. Dar 1:25 vel aṭang chuan an sawi lawk ang ngeiin sleet (khaw vawh vang a ruah khal) a rawn sur zui ta chiam mai a, kawng a ti nal zual kher mai. Hna thleng thei lovin kawngah chuan tang ve ta ila, keimah leh keimah ka insit ngawtin ka ring. Pathian zarah ka motor khalh mek, hlui ve bim bem tak mai, 2000 Honda Accord LX chuan tluang takin ka hnathawhna chu min thlen ta a ni. Tumkum thlasik hi a na viau mai ang tih a hlauhawm khawp mai!
Nissan car leh Honda Pilot:
Mazda:
Salt/plow truck hian kawng thian char char mahse, an hnehlo a ni ber ṭhin e:
Park kopang khawp mai:
Vur a tlak tamlai hian motor khalhtu tan ninawm viau mahse, chutih hunlai ai mah chuan a hnu a a khal hian a hlauhawm zual ṭhin. Vur tui an khal leh khan tui tling ang maiin a lang si a, tleng zawk a awlsam em em mai a ni. Hetiang hi black ice tih a ni nghe nghe. Kawngpui phah dum a langtlang thei vek si a, chumi aṭang a an phuah a ni mahna! A dang pakhat, freezing rain an tih chu a sur leh bawk a. Hemi hi chu ruah pangai sur a ni a mahse boruak leh a farna/tlakna tur kha minus degree aia a vawh a vangin a tlakna naah khan a khal nghal ṭhin a, motor tan hlauhawm tak a ni bawk.
An na lo hlauh:
Motor tan vur tlak a nghahhlelhawm loh viau ṭhin laiin, naupang tan infiam nan a nuam em em mai a, a mawi bawk nen, a thianghlimna ngawt pawh thlir tham a ni ṭhin. Puitling tan pawh hun insiam thei tan chuan ski resort lamah kalna hun a ni a, vur a han tleng vel hi a nuam em em mai bawk. Kei zawng hun ka insiam theih lohna hi kum tam a vei ta, chhungkaw tan a chawlh neih khawl a ngaih ṭhin vang a nih bakah, chawlh ka neih tam ve ngai loh vang a ni ber.
A phur mah mah:
Jacob leh Janis, snowman siam tum:
Janis snow angel siam:
Nuam an va ti em!:
Nimin, December 10, 2013 khan a rawn sur leh chiam mai a, naupang sikul pawh an chawlh phah a ni.
La thiam lemlo mah ila a mawi sa na na chu a lang mawi ve zel mai:
Khua a tha leh tan ta:
Bonus:
